CEBU CITY- Nadakpan ang duha ka lalaki ug narekober ang kapin tunga sa kilo nga gidudahang shabu nga nagkantidad og ₱3.7 milyon sa buy-bust operation nga gipahigayon sa PDEA-7 ug Cebu City Police Office Station 2 sa Sitio Plaza Goma, Barangay Sambag I, alas 4:05 sa hapon niadtong Abril 16, 2026.
Giila ni PDEA-7 Regional Director Joel B. Plaza ang target sa operasyon nga si alias Raffy, 37 anyos, food vendor ug residente sa maong barangay, uban sa iyang kauban nga si alias Harold, 28 anyos, janitor ug taga-Lamac, Consolacion, Cebu.
Sumala sa PDEA-7, nakumpiskar sa operasyon ang 21 ka pakete sa gidudahang shabu nga mokabat og 550 gramos, nga adunay gibanabanang kantidad nga ₱3,740,000.
Narekober usab ang buy-bust money, upat ka cellphone, ug uban pang non-drug evidence.
Dugang pa sa PDEA-7, ang operasyon nasikop pinaagi sa impormasyon gikan sa usa ka confidential informant nga misangpot sa tulo ka semana nga case buildup.
Nadiskobrehan usab nga ang mga suspek bag-ong nailhang drug personalities nga gituhuan nga makahurot og mokabat sa usa ka kilo nga shabu matag semana.
Ang mga ebidensya gidala na sa PDEA-7 Regional Office Laboratory alang sa hustong pagproseso, samtang ang mga suspek anaa karon sa kustodiya sa PDEA-7 detention facility sa Lahug, Cebu City.
Atubangon sa mga nadakpan ang kasong pagbaligya og ilegal nga droga nga posibleng magresulta sa silot nga life imprisonment ug multa nga mokabat hangtod ₱10 milyon.
