Gipahibalo ni Labor Secretary Francis Tolentino niadtong Martes ang pagtaas sa sweldo nga P85 kada adlaw sa Metro Manila. Diin, ubos sa Wage Order NCR-27, ang pagtaas himuon sa duha ka tranche: ang unang tranche nga P60 mahimong epektibo sa Hulyo 19, samtang ang ikaduhang tranche nga P25 mahimong epektibo sa Enero 20, 2027.
Kung hingpit nga mapatuman, ang minimum wage sa Metro Manila motaas gikan sa P695 ngadto sa P780 kada adlaw para sa mga non-agricultural workers, samtang P658 ngadto sa P743 para sa mga agricultural workers.
Subay niini, eksklusibong nahinabi sa Bombo Radyo Cebu si Jaime Paglinawan, ang chairperson sa BAYAN Central Visayas, aron masuta kung unsa ang ilahang reaskyon kabahin niini, ilabi na nga buot makab-ot sa mga labor groups dinhi sa Sugbo nga ang daily wage sa mga mamumuo moabot sa P1,200.
Matod ni Paglinawan, ang P85 nga usbaw sa sweldo sa mga mamumuo sa kaulohan nagpakita sa bunga sa ilahang pakigbisog, apan kung ikompara dinhi sa Central Visayas, iyang gilatid ang kadako niini og gintang o labaw.
Apan matod niya, ang maong usbaw sa sweldo partikular na sa NCR, layo pa kini sa tinuod kung ibasi sa batakang balaod nga gikinahanglan nga matugyanan ang mga mamumuo og makabuhinhg suholan, hinungdan nga alang kaniya, layo ra kayo kini sa gitantsa nilang sweldo nga mokabat sa 1, 200 pesos.
Kay alang kaniya, ang P1,200 nga daily wage mao ang gikonsiderang family living wage nga adunay 5 ka miyebro.
Ligdong usab ang baruganan ni Paglinawan nga ang P1, 200 pesos nga daily wage nga ilahang padayong giduso matod pa, igo na sa inadlaw-adlaw tungod kay makahatag na kini og balanse ug sustansyadong pagkaon sa usa ka pamilyahan.
Dugang niya nga, ang maong kantidad sa daily wage makahatag na og usa ka desenteng pagpuyo, ug makalikay nga ang matag mamumuo maputos og mga kautangan. Ilabi na nga sa karon, ang trabaho na ang gihimong garantiya aron makabayad sa utang, ug aron adunay mautangan.
