Nagpasidaan ang state-run think tank nga Philippine Institute for Development Studies (PIDS) nga posibleng mosaka ang gidaghanon sa mga Pilipino nga mahulog sa kakabos tungod sa pagsaka sa presyo sa lana sa pangkalibutanong merkado.
Sa ilang pagtuon, gipakita nga kung ang presyo sa krudo moabot sa $105 kada bariles ug 35% sa maong pagsaka ipasa sa lokal nga presyo, ang poverty rate sa Pilipinas mosaka gikan sa 13.2% ngadto sa 14.4%.
Nagpasabot kini nga daghang “near poor” o mga pamilyang adunay kita nga gamay ra nga labaw sa poverty line ang posibleng mahulog sa kakabos tungod sa pagsaka sa adlaw-adlaw nga gasto.
Sumala sa PIDS, ang mga kabus mao ang labing maapektuhan tungod kay kadaghanan sa ilang kita gigamit sa batakang panginahanglan ug limitado ra ang ilang tinigom.
Gibanabana usab nga ang purchasing power sa mga kabus nga pamilya mahimong mokunhod hangtod 16.2%, kon itandi sa 3.4% lamang sa mas adunahang sektor.
Nagpasidaan pa ang think tank nga kung mosaka pa ang presyo sa lana ngadto sa $125 hangtod $145 kada bariles, posibleng moabot sa 2.35 milyon hangtod 3.5 milyon ka Pilipino ang mahimong madugang sa populasyon sa kakabos.
Tungod niini, gisugyot sa PIDS nga mas palig-onon ang suporta ug tabang alang sa mga kabus ug “near poor” nga mga pamilya, lakip na ang mga minimum wage earners ug uban pang vulnerable nga sektor, aron maminusan ang epekto sa posibleng krisis.
