Mokabat sa gibanabana nga P1.6 milyon ang danyos human masunog ang usa ka mall warehouse sa Barangay Banilad, Cebu City, niadtong Domingo sa buntag, sumala sa Cebu City Fire Station (CCFS).
Ang sunog sa storage warehouse sa Gaisano Country Mall gideklarar nga napalong na sa alas 11:31 sa buntag, o 30 minutos human kini gipailalom sa kontrol sa alas 11:01 sa buntag.
Matod sa CCFS, ang warehouse nga gipanag-iya sa Gaisano Brothers Merchandising Inc. nakahiagom og partial damage.
Una nga gitaho ang insidente sa sunog sa alas 8:42 sa buntag, ug miabot ang mga bombero sa lugar lima ka minutos human niini, sa alas 8:47 sa buntag. Gipataas kini sa first alarm sa alas 8:54 sa buntag samtang naningkamot ang mga responder nga mapugngan ang kalayo.
Mokabat sa 25 ka responder ug 10 ka fire truck ang gipadala sa lugar, samtang 15 ka auxiliary personnel ug usa ka ambulansya usab ang gipadala.
Walay natalang kaswalti o namatay sa insidente.
