CEBU – Nigawas sa labing uwahi nga taho sa Cebu City Health Department (CHD) nga dili mominus sa 1,877 ka mga menor de edad kinsang edad singko hangtud sa onse-anyos ang nabakunahan na kontra COVID-19 sa nakalabay nga semana.
Adunay duha ka vaccination site ang gimontar sa syudad alang sa maong age group diin nahimutang kini sa Cebu City Sports Complex (CCSC) ug sa Ayala Center Cebu ug napuno pa kini sa mga cartoon characters ug decorations arun mawagtang ang kabalaka sa mga bata.
Matud pa sa pangud sa CHD nga si Dr. Jeffrey Ibones, paigo pa kining duha ka site tungod minus palang ang available nga doses alang sa bata ang gi-alokar sa syudad.
Diin gihayang gibutyag nga anaa lang sa 6,000 ka mga Pfizer COVID-19 vaccine ang gi-alokar sa national government sa dakbayan sa Sugbo.
Dugang pa niini nga gilauman usab sa syudad nga modaghan pang mga bata ang mabakunahan sa mga mosunod nga adlaw tungod nidaghan usab ang nagparehistro.
Gihingusgan usab niini nga kung mahurot na ang bakuna kay mangayo na sila daan sa Department of Health diin target nila nga makapabakuna og anaa sa 500 ka mga bata matag adlaw.
Pahimagno pa usab sa opisyal sa mga ginikanan nga walay walk-in tungod limitado lang ang doses.
