CEBU CITY- Nalumos-patay ang usa ka 21-anyos nga ka fresh graduate, samtang tulo ka mga kauban ang naluwas human ma-stranded sa Budlaan Falls sa Barangay Budlaan, dakbayan sa Sugbo niadtong Sabado, Hulyo 12, 2025.
Ang biktima giila nga si Jerson Caballes, gradwado sa kolehiyo ug residente sa Barangay Kamputhaw, dakbayan sa Sugbo.
Matod ni Barangay Budlaan Kapitan Nerissa Antolijao sa ekslusibong pakighinabi sa Bombo Radyo Cebu Newsteam nga si Caballes ug iyang mga higala milakaw paingon sa Mt.Kan-Irag sa kasikbit nga Barangay Sirao.
Samtang sa ilang pagpaingon, kalit lang natanggong ang grupo kay nisaka ang tubig sa sapa tungod sa pagbunok sa uwan.
Si Caballes, kinsa gikatahong dili makamaong molangoy, giingong nisuway pagtabok sa sapa nga maoy hinungdan sa iyang pagkahulog ug pagkalumos.
Samtang, Luwas nga naluwas ang laing tulo pinaagi sa search and rescue operation nga gipangulohan sa Bureau of Fire Protection – Special Rescue Force Central Visayas.
Ang lokal nga kapolisan ug mga opisyal sa barangay nipahimangno na ngadto sa mga hiker, partikular na sa mga grupo sa kabatan-onan, nga kanselahon ang pag-hike panahon sa dili maayo nga panahon, ilabi na sa mga dapit nga adunay nagaagay nga tubig. | Bombo Nathaniel Sandoval
