PROVINCE OF CEBU-Patay ang usa ka emergency responder samtang laing tulo ang naangol human nalimbuwad ang ilang gisakyang ambulansya dihang nibuto ang ligid samtang naglawig sila sa national highway sa Barangay Tulic, lungsod sa Argao gahapon Huwebes Hunyo 13, 2024.
Nasayran nga ang mga biktima gikan sa Vicente Sotto Memorial Medical Center (VSMMC) ug pauli na unta sa Dipolog City sa Zamboanga del Norte diin sila nagbase.
Giila ang namatay nga biktima nga si Jules Campoy nga taga Biasong, Dipolog City, Zamboanga del Norte.
Gideklarar siya nga dead on arrival sa attending physician sa Isidro C. Kintanar Memorial Hospital (ICKMH) sa lungsod sa Argao.
Samtang ang mga naangol mao sila si Nurse John Aripal, emergency responder Ronel Adriatico, ug ang drayber nga si Victor Calasang Jr. pulos taga Zamboanga del Norte.
Una niini, adunay taga lungsod sa Manukan, Zamboanga del Norte ang gihatod sa ambulansya sa Cebu sa Vicente Sotto Memorial Hospital aron patambalan, gani ang pamilya sa ilahang gihatud naghangyo pag tabang pinansyal alang sa ilang kabanay nga si Benedict Fabular kinsa nabalian pila ka adlaw ang milabay human na disgrasya sa Loquilos Manukan, ZDN.(photos by:Argao Mdrrmo)
