CEBU CITY — Gikumpirmar ni Cebu Provincial Governor Gwendolyn Garcia nga lakip sa mga bag-ong natakdan sa COVID-19 mao ang usa ka one-month-old nga masuso.
Kini human nga napun-an og walo ka mga kaso sa COVID-19 sa probinsya sa nakalabay nga upat ka adlaw.
Matud ni Garcia nga nakasinati ang maong baby nga taga-Argao og hilanat ug ubo.
Gibutyag usab ni Garcia nga natala sa lungsod sa Badian ang ikaduhang kaso sa coronavirus nga mao ang usa ka security guard nga gikan lang sa dakbayan sa Sugbo.
Apil sa mga bag-ong nagpositibo sa COVID-19 ang mga tulo ka mga jail guards sa Cebu Provincial Detention and Rehabilitation Center (CPDRC).
Una nang gibutyag sa tagsa-tagsa ka mga local chief executives ang duha ka mga bag-ong kaso sa Talisay City ug ang unang kaso sa lungsod sa Carmen.
Anaa na sa 76 ang kinatibuk-ang ihap sa mga confirmed cases sa COVID-19 sa Cebu Province.
