CEBU CITY-Mokabat sa 10 ka mga Chinese national kinsa gituohang gi tortured ang naluwas atol sa joint operation sa National Bureau of Investigation-Cebu District Office (NBI-Cebdo) ug National Bureau of Investigation-Central Visayas Regional Office (NBI-Cevro).
Sa Facebook live broadcast sa NBI-Cebdo, si Special Investigator IV Bienvenido Panican, executive officer sa operasyon sa NBI-Cebdo sa Mandaue City, nitug-an sa media nga ang mga biktima ilegal nga gitanggong sukad niadtong Septiyembre 5, 2023.
Dugang pa ni Panican nga ang taho gikan kang Glendelle Grace Salvador Nerviola, ang live-in partner ni Chong Yi Wie, usa sa mga Chinese national, kinsa gihuptan sa iyang amo sulod sa kapin sa duha ka semana.
Dugang pa niya nga ilang nakit-an ang lugar nga detensyon pinaagi sa surveillance, uban sa tabang ni Nerviola.
Hinungdan nga niadtong Miyerkules sa gabii, Septiyembre 20, 2023, si Wie, kauban si Edison Lin, Yufeng Mountain, Wang Dongxin, Peter Wang, Zhang Ende, Wang Kai Cheng, Wan Tianhai, Chen Yee Chen, ug Dixon Zhang (tinuod nga ngalan nga Jhang Jia Ming), naluwas gikan sa giabangang balay sa No. 77B Paseo Eulalia, Villa Lusia Park, Barangay Banilad, dakbayan sa Sugbo.
Kini nga mga indibidwal gikataho nga nalambigit sa usa ka online shopping scam, nga nagtarget sa mga biktima sa China.
