Nagpositibo ang napulo ka jeepney drivers sa gipahigayon nga random drug testing sa Land Transportation Franchising and Regulatory Board o LTFRB-7 sa nakalabay nga semana..
Gikumpirmar kini ni LTFRB-7 Regional Director Abosamen Matuan, kinsa miingon nga ang napulo ka drivers sakop sa usa ka operator.
Gipahigayon ang random drug testing human sa insidente niadtong Hulyo 21, diin usa ka babaye ang nasikop sa National Bureau of Investigation kon NBI-7 tungod sa giingong pagbaligya og ilegal nga droga sa mga 01k drivers.
Sa pagkakaron, gipailalom sa confirmatory test ang resulta sa unang drug testing. Samtang wala pa makumpirma ang resulta, temporaryong gidid-an sa LTFRB-7 sa pagmaneho ang napulo ka drivers.
Kung makumpirma nga positibo gihapon ang ilang resulta, dili na sila tugotan sa pagbalik sa pagmaneho.
Gipahimangnoan usab ni Matuan nga responsibilidad sa mga operator ang pagsiguro nga ang mga kwalipikado ug angay sa trabaho ang ilang mga i-hire nga mga drivers.
