Nangaangol ang siyam ka mga pasahero ug drayber human naaksidente ang van nga ilang gisakyan gahapon sa may N. Bacalso Avenue sa Barangay Banhigan, lungsod sa Dalaguete.
Basi sa taho sa Dalaguete Police Station diin nagkanayon nga ang van nga gimaneho sa 38-anyos nga si Robert Muñez, taga Barangay Garing sa lungsod sa Consolacion, Sugbo, nagsubay sa national road dihang kalit kining nabangga sa poste sa suga.
Human sa bangga kay nawad-an og kontrol sa manobela ang drayber hinungdan nga nabalitok ang sakyanan sa daplin sa karsada.
Tungod sa impact, nakaangkon og physical injuries ang siyam ka mga pasahero uban sa driver.
Daling niabot ug gidala ang mga biktima sa mga rescue personnel sa Municipal Disaster Risk Reduction and Management Office sa Argao District Hospital.
Sa gipaambit ni Police Senior Master Sergeant Runard Bureros, traffic investigator sa Dalaguete Municipal Police Station, nga gikan sa habagatan ang van human gi-pick up ang mga kabanay ug paingon na untang mopauli sa Barangay Garing sa Consolacion dihang gikatahong nasayop sa kalkulasyon sa dalan ang drayber hinungdan sa pagkabangga.
Ingon man nga anaa na sa stable nga kondisyon ang tanang pasahero sa van human pulos mga samad ang mga naangkon.
Sa pikas bahin, 4 ka mga sakyanan ang gidaro sa usa ka modernong jeepney sa Marcelo Fernan Bridge sa samang adlaw.
Basi sa inisyal na imbistigasyon nga posibleng nawad-an og preno ang jeep hinungdan nga midaro kini sa laing mga sakyanan.
