LAPU-LAPU- Gideklarar nga “drug-cleared” ang 11 ka mga barangay sa dakbayan sa Lapu-Lapu samtang ang usa ka barangay niini giila isip “drug-free”.
Sa eksklusibong pakighinabi sa Bombo Newsteam kang Mr. Garry Lao, ang pangu sa City of Lapu-Lapu Office for Substance Abuse Prevention (CLOSAP), gitataw niini nga ang mga “drug-cleared” barangays kay mao ang mga island-barangays sa isla sa Olango nga Caw-oy, Baring, Tungasan, Tingo, Sabang, Santa Rosa, ug San Vicente.
Samtang drug-cleared usab ang mga isla sa Caubian ug Pangan-an, uban sa duha ka mainland barangay, Suba-basbas ug Calawisan.
Ang hiniusang “drug-free” barangay sa dakabyan kay mao ang Caohagan.
Dugang pa ni Lao nga adunay laing duha pa ka barangay ang nagpaabot sa validation isip mahimong drug-cleared barangays kay mao ang Talima ug Ibo.
Giklaro usab ni Lao nga samtang giklasipikar nga “drug-cleared” wala magpasabot nga hingpit nang wala sa drugas, inay nagpasabot lamang kini nga padayon ang pagpaningkamot aron mapabilin nga drug-free ang lugar.
Dugang pa, nga ang “drug-free” nagpasabot nga walay nataho nga kalihokan sa ilegal nga drugas sa maong dapit.
