CEBU CITY-Makadawat og bag-ong mga patrol cars gikan sa Cebu City Government ang 11 ka police stations sa dakbayan sa Sugbo sa dili pa ipahigayon ang Palarong Pambansa sa buwan sa Hulyo.
Mao kini ang gi-anunsyo ni Acting Mayor Raymond Alvin Garcia atol sa pagsaulog sa ika-126 nga anibersaryo sa Philippine Independence Day.
Matud pa ni Garcia nga ang CCPO nihangyo og dugang mga sakyanan nga gamiton sa beat patrols atol sa ilang katapusang command conference, ug iyang gitugot ang maong hangyo.
Diin ang acting mayor nipadayag og paglaum nga daghang mga pulis ang makita sa kadalanan atol sa Palarong Pambansa, ilabi na nga kapin sa 20,000 ka mga atleta gikan sa tibuok Pilipinas ang gipaabot nga mosalmot.
Nasayran nga ang kagamhanan sa dakbayan sa Sugbo nigasto og P8 milyones sa pagpalit og 11 ka bag-ong mga sakyanan, gamit ang kuwarta sa Peace and Order program ug gikatakdang i-turn over sunod semana.
Gani, nipadayag og pasalamat si Colonel Ireneo Dalogdog, ang hepe sa Cebu City Police Office sa kagamhanan sa dakbayan sa walay puas nga suporta niini sa mga sakop sa kapulisan.
Matod niya, nga dako og papel ang mga sakyanan sa pagpreserbar sa kalinaw ug kahapsay sa dakbayan.
Ingon man nga misaad si Dalogdog nga i-maintainn og maayo ang mga sakyanan aron kini molungtad og dugay.
