Ni-atake ang pipila ka mga armadong lalaki sa usa ka police checkpoint sa amihanan-kasadpang probinsya sa Khyber Pakhtunkhwa sa Pakistan duol sa utlanan sa Afghanistan, hinungdan sa kamatayon sa 11 ka mga pulis, ug pagka-angol sa laing 28 niini.
Sumala sa lokal nga mga awtoridad, ang pag-atake nagsugod sa distrito sa Hangu human ang mga suspek mi-target sa checkpoint gamit ang mga quadcopter nga nagdala og mga explosives sa wala pa moatake.
Ang mga panagsangka tali sa grupong Islamista ug mga pwersa sa seguridad milungtad og pipila ka oras diin 15 ka suspek ang namatay.
Lakip sa mga namatay mao si Deputy Superintendent Diyar Khan nga gipadala sa lugar aron motabang sa mga pulis nga nag-duty.
Samtang si District Police Officer Mujahid Hussain miingon nga ang mga armado nagsunog sa tulo ka mga sakyanan sa pulis ug nakabangga usab sa usa ka sakyanan sa pulis sa wala pa maka-ikyas.
Sa karon, walay bisan kinsang grupo nga miangkon sa responsibilidad sa pag-atake apan kini nahitabo pipila ka adlaw human sa usa ka suicide bombing batok sa mga sundalong Pakistani sa silingang distrito sa Tank nga gihuptan sa Tehreek-e-Taliban Pakistan.
Ang kapintasan nagpadayon sa pag-usbaw sa mga lugar nga duol sa utlanan sa Pakistan-Afghanistan diin ang pulis ug militar kanunay nga target sa mga pag-atake.
Ang gobyerno sa Pakistan nag-alegar nga ang mga armadong grupo naggamit sa Afghanistan isip dangpanan alang sa pagbansay ug pagplano sa mga pag-atake sa ilang nasud.
