Midangop sa Bombo Radyo Cebu ang uyoan ug eg-agaw sa biktima sa 11-anyos nga batang lalaki human kini nadombolan niadtong Enero 27 sa VNM and Sons Taxi sa Brgy. Pardo dakbayan sa Sugbo.
Si Allan Dinopo, kinsa uyoan sa bata, ug Christian Dinopo, ang ig-agaw niini, nagpakitabang human wala dawata ang 11-anyos nga pasyente sa Chong Hua Hospital gumikan wala silay ika-down sa hospital bill niini.
Matod pa sa duha nga sa pag-abot nila sa maong tambalanan giingnan sila nga adunay down apan ila kining giingnan nga wala silay kwarta ug ang operator sa taxi ra ang muabaga sa maong gastuhan.
Apan walay representante sa VNM and Sons taxi ang nipakita sa maong tambalanan hinungdan sa ika duha nga higayon giingnan sila sa maong tambalanan nga pabalhinon ug lain gumikan walay bakanti nga ICU.
Nabalaka ang pamilya gumikan anaa sa kritikal nga kahimtang ang 11-anyos ug wala gayud kini matagad sa maong tambalanan.
Dugang pa usab sa ig-agaw nga kun dili sila makahatag ug P80,000 sa nahisgutang tambalanan, e-pull out ang pasyente.
Sa pagkakaron, padayon nga nangayu ug tabang ang pamilya sa biktima ingon man pag-locate sa operator sa maong taxi.
Gitataw sa usa ka manlalaban nga dili na kinahanglang mangayo og deposit ang mga tambalanan ubos sa Republic Act 10932 o ang Anti-Hospital Deposit Law.
Matud ni Atty. Clarence Paul Oaminal ng dili obligado ang pasyente nga mohatag og deposito kung i-admit man ug nasayud nang daan ang mga tambalanan kalabot na sa nahisgutang balaud.
Mitambag ang maong manlalaban alang sa mga naapektaran nga isang-at ang ilang sumbong sa Department of Health aron imbestigaran. (Lahvi Quiñones/GN)
