Aduna nay na-hire ug gikatakdang idestino sa mga nagkadaiyang tambalanan nga gidumala sa kagamhanang lalawigan sa Sugbo ang administrasyon ni Cebu Provincial Governor Pamela “Pam” Baricuatro.
Gipresentar ni Gov. Baricuatro ang mga General Practitioners Medical Professionals niadtong Miyerkules, Agosto 6 sa Cebu Provincial Capitol atol sa pagsaulog sa ika-456 Founding Anniversary sa lalawigan.
Gisiguro sa Kapitolyo ang ilang ligdong nga suporta atol sa pagsugod sa pagserbisyo sa mga doktor ngadto sa mga Sugboanon.
Ang mga doktor kay madestino sa mga lungsod ug dakbayan sa Daanbantayan, Sogod, Barili, Tuburan, Minglanilla, Carcar City, Argao, Danao City.
Ang deployment sa mga medical professional kay kabahin sa tinguha sa Kapitolyo nga palambuon ang serbisyong panglawas sa lalawigan nga pipila ka tuig nainutil sa nakalabayng administrasyon.
