CEBU CITY — Gikatakdang imbestigaran ni Cebu City Mayor Edgardo Labella kung nganong nakabalik ang 12 ka mga tinun-an ngadto sa ilang tinubdan sa Maguindanao bisan og wala gipaubos sa COVID-19 testing.
Kini human nga napamatud-an sa Department of Health (DOH) nga nagpositibo sa maong virus ang maong tinun-an sa dihang nakabalik sa maong probinsya.
Nasayran nga nahatagan lang sila og certification to travel sa dihang nibyahe kini paingon sa Cagayan de Oro City apan wala kini gipaubos sa testing.
Gibarugan sa tigpamaba sa mayor nga si City Legal Officer Rey Gealon nga nagsubay ang kagamhanan sa mga patakaran sa Inter-agency Task Force maong angayang mosunod ang kinsang gustong makabalik sa ilang lugar.
Kini sama lang sa mandatory nga COVID-19 test ug pagpaubos sa 14-day quarantine sa dili pa hatagan og certification of travel ug entry clearance gikan sa port of entry.
Dugang pa ni Gealon nga nakig-alayon na ang Cebu City Government sa mga opisyal sa Maguindanao aron sutaon kung diin nakuha sa mga tinun-an ang makamatay nga virus.
Gipaubos na karon sa isolation ang 12 ka mga estudyante sa usa ka isolation facility duol sa Maguindanao Provincial Hospital.
