Naapektuhan ang dose (12) ka pamilya, o mokabat sa 60 ka indibidwal, sa sunog nga miulbo pasado alas-3 sa kaadlawon niadtong Pebrero 28 sa Sitio Sto. Niño, Barangay Basak, sumala sa Lapu-Lapu City Disaster Risk Reduction and Management Office (CDRRMO).
Dali nga miresponde sa maong insidente ang Lapu-Lapu City Fire District, Lapu-Lapu City Rescue, ug ang mga fire volunteers. Sa inisyal nga report, nasayran nga unom (6) ka balay ang hingpit nga naugdaw, samtang tulo (3) usab ang nakan-an sa kalayo o partially damaged.
Sa pagkakaron, ang City Social Welfare and Development Office (CSWDO) nagpahigayon na og mga interview ug assessment sa mga pamilyang nawad-an og panimalay.
Sa laing bahin, ang Lapu-Lapu City Rescue nihatag na og medical assistance ug mga batakang panginahanglanon alang sa mga apektadong residente.
Nagpadayon usab ang DRRM Humanitarian Assistance Response Team sa pag-proseso sa intake alang sa mga biktima, diin giandam na ang mga food pack nga ipang-apod-apod sa mosunod nga mga adlaw.
