CEBU – Nangayo ug donasyong pagkaon ang mga opisyales sa Barangay Pit-os sa dakbayan sa Sugbo, tungod kay adunay 130 ka mga tawo ang temporaryong gipasilong sa ilang gym gumikan sa kusog nga pagbaha gahapon sa hapon Biyernes, Septiyembre 9, 2022.
Gibutyag ni Konsehal Dexter Velayo, nga lima ka mga balay ang naanod sa kusog nga baha, samtang 15 ka mga balay ang nangaguba.
Matod ni Velayo nga walay natala nga kaswalti human sa insidente, apan nagproblema karon ang barangay kon unsaon paghatag ug pagkaon ang mga apektadong indibidwal sanglit wala silay igong mga probisyon.
Ang konsehal niingon nga ang mga naka-standby nga food packs nga gihatag sa Department of Social Welfare and Development nahurot na sa sunodsunod nga mga insidente sa pagbaha nga nahitabo sa miaging mga buwan.
