Nipaambit sa iyang pag-uyon ang pangu sa budget and finance ang sugyot nga ihatag og sayo ang 13th month pay sa mga empleyado sa dakbayan sa Sugbo.
Atol sa pakighinabi sa Bombo Newsteam kang Konsehal Dave Tumulak, gipunting niini nga ang maong sugyot kay makatabang sa pamilya sa mga empleyado nga naapektuhan sa Bagyong Tino.
Giklaro usab sa opisyal nga ang 13th month pay ug bonus kay usa lang apan aduna pa’y P5,000 nga mandatory bonus nga gilatid sa Department of Budget and Management.
Pagpasabot usab ni Konsehal Tumulak nga lisod na kab-oton ang additional bonus sa mga empleyado nga mikabat og P35,000 gumikan dili haom sa kasamtangang sitwasyon sa dakbayan nga nakahiagom pa og grabeng kadaot nga gibilin sa mga katalagman.
Ingon man nga daghan pa usab ang nagkinahanglan og hinabang, busa gituohan sa opisyal nga ang P5,000 nga bonus kay igo na ug patas alang sa mga magbubuhis.
