CENTRAL VISAYAS-Malampusong naluwas ang 14-anyos nga bata nga giingong gilugos sa iyang ama-ama sulod sa lima ka tuig.
Pinaagi sa hiniusang rescue operation nga gihimo niadtong Hulyo 26 sa National Bureau of Investigation 7 ug Department of Social Welfare and Development 7, nagtingkagol na sa prisohan ang ama-ama.
Matud sa NBI 7 nga nakadawat sila og taho niadtong Hulyo 16, gikan sa usa ka concerned citizen nga miingon sa kahimtang sa biktima.
Asoy nila nga ang biktima nitug-an sa iyang classmates bahin sa nahitabong pag-abuso nga iyang giatubang sa ilang kaugalingong balay.
Hinungdan nga mihimo dayon og hot pursuit operation ang NBI.
Matod ni Atty. Wenceslao Galendez Jr., Agent ug Case-in-charge sa NBI-7, nga gisaysay usab sa biktima nga gilugos kini sa suspek sa mismong adlaw nga kini na-rescue.
Sa gipagawas nga pamahayag sa NBI 7, nagsugod ang pag-abuso sa dihang gibana-banang otso anyos pa ang biktima.
Diin gihulga siya sa ama-ama nga dili ibutyag ang pag-abuso, kung dili, gub-on niya ang ilang pamilya.
Sa pagkakaron, anaa na sa kustodiya sa DSWD ang bata aron ipaubos sa Psychosocial intervention, samtang ang stepfather gidakop na ug nag-atubang og kasong statutory rape ubos sa Revised Penal Code Amended by RA8353 ug RA11648.
