CEBU CITY — Abagahon sa lokal nga pangagamhanan sa dakbayan sa Sugbo ang pagpalubong sa patay’ng lawas sa menor-de-edad nga lalake nga naanod atol sa grabeng pagbaha sa syudad niadtong Martes sa gabie.
Kini ang gibutyag ni Mayor Labella kinsa personal nga nisaksi sa search and retrieval operations sa biktima gahapon sa hapon.
Nakit-an ang patay’ng lawas sa batan-on sa Gen. Maxilom Avenue sa mga sakop sa Cebu City Disaster Risk Reduction and Management Office (CCDRRMO), Bureau of Fire Protection ug uban pang volunteers nga nitabang aron makit-an ang lawas sa biktima.
Gi-ila usab sa apohan nga si Lucia Maribeles ang iyang apo nga si Hansel Dayondon kinsa igo lang matod pa nga natulog ilawon sa taytayan uban sa iyang barkada niadtong nibundak ang kusog nga uwan.
Nakabantay matod pa ang biktima ug mga kauban niini nga nitaas na ang tubig-baha apan tungod sa kakusog sa bul-og sa tubig nagpabuhi na lang kini sa nagkapot kaniya ug magpa-anod na lang sa baha.
Samtang lakip sa nasugatang problema sa mga recuers sa biktima mao ang kabaga sa mga debris nga nibabag sa mga kasapaan ug kanal sa dakbayan.
Basura ug mga nakababag
Gitahasan ni Labella ang Quick Response Team sa dakbayan sa Sugbo uban sa mga hingtungdang ahensiya alang sa pag-suta sa mga edipisyo nga nakababag sa mga creeks aron hinay-hinay nga tang-tangon ang mga obstructions.
Hinu-on gibutyag sa Mayor nga dili dali-dali-on sa lokal nga pangagamhanan ang management sa maong mga building sanglit posibleng aduna kini sila’y permit sa Department of Public Works and Highways (DPWH).
Subay niini gikatakdang ipatawag sa Mayor ang taga DPWH ug ubang ahensiya alang sa maong concerns.
Samtang lakip usab sa gi-planong tagbu-on sa Mayor ang mga bottled water manufacturers aron mahan-ay ang mga posibleng pama-agi nga di mapataka ug labay ang mga plastic nga mao ang usa sa nakitang hinungdan sa pag-awas sa mga kanal sa dakbayan, human nga nabara sa mga plastic nga basura.
Usa sa gi-rekomendar sa Mayor ngadto sa mga manufacturers, ang pagmontar ug receptacles aron didto na ibutang sa mga tawo ang ilang mga plastic nga basura.
Kahinumduman nga nag-antos ang kasagaran sa mga Sugbu-anon human nga nakasinati ug grabeng pagbaha niadtong Martes sa gabie, samtang aduna usa’y tulo ka kinabuhi ang nakalas gumikan sa maong insidente. (report by Bombo Jun Salde/gbs/gn)
