Patay ang labing menos 14 ka mga bata ug lima pa ang nasamdan human nahugno ang atop sa usa ka tutoring center sa sa Lahore sa Pakistan niadtong Martes.
Gikumpirma sa mga opisyal sa siyudad ang ihap sa mga namatay ug giingon nga usa ka magtutudlo ang nasamdan usab.
Ang mga biktima nag-edad og 4 hangtod 12, samtang ang mga nasamdan gitambalan pa sa ospital.
Gidakop sa mga awtoridad ang duha ka tawo nga may kalabotan sa insidente.
Nagpadayon usab ang pagkolekta sa mga ebidensya gikan sa lugar sa trahedya.
Nagpaabot og pahasubo si Pakistan Prime Minister Shehbaz Sharif sa pamilya sa mga biktima ug gimando ang hinanaling medikal nga tabang sa mga nasamdan.
Ang opisyal miingon nga ilang ipatuman ang usa ka “transparent, walay gidapigan ug hinanaling imbestigasyon” aron mahibal-an kung kinsa ang responsable sa trahedya nga insidente.
Nasuta nga ang pagkahugno sa mga building komon sa Pakistan tungod sa dili maayo nga mga sumbanan sa kaluwasan ug mga materyales nga ubos ang kalidad.
Sa miaging tuig, 27 ka mga tawo usab ang namatay human nahugno ang usa ka building sa Karachi, Pakistan.
