Patay ang labing menos 14 ka tawo sa gidudahang suicide bombing sa gawas sa usa ka estasyon sa pulis sa Kabal area, distrito sa Swat, sa lalawigan sa Khyber sa amihanan-kasadpang Pakistan.
Sumala sa mga awtoridad, lakip sa mga namatay ang lima ka pulis, walo ka sibilyan, ug ang gidudahang suicide bomber.
Labing menos anaa usab sa 18 ka tawo ang nasamdan sa maong insidente.
Nahitabo ang pagbuto atol sa usa ka pro-police rally, apan wala pa makumpirma kung maoy target sa pag-atake ang maong kalihokan.
Giangkon sa militanteng grupo nga Tehreek-e-Taliban Pakistan ang responsibilidad sa pagpamomba.
Gipahayag ni Pakistani Prime Minister Muhammad Shehbaz Sharif ang iyang pahasubo sa mga biktima ug gikondenar ang maong pag-atake.
Samtang, naglunsad ang kapulisan og operasyon aron mailhan ug madakpan ang ubang posibleng nalambigit sa insidente.
Nagpadayon ang Pakistan sa pag-atubang sa nagkadaghang insurhensiya, ilabina sa mga dapit duol sa utlanan, diin kanunayng gitarget sa mga pag-atake ang mga pwersa sa pulis ug militar.
Padayon usab nga giakusahan sa Pakistan ang Taliban sa Afghanistan sa paghatag og suporta sa mga militanteng grupo. Apan, padayon kining kusganong gihimakak sa Taliban.
