CENTRAL VISAYAS-Sikop ang 142 ka mga drug personalities diin dul-an sa P10 Milyones nga kantidad sa illegal nga drugas ang nasakmit sa Police Regional Office 7 atol sa ilang gipahigayon nga duha ka adlaw nga Simultaneous Anti-Criminality and Law Enforcement Operation gikan sa Enero 27-28, 2024.
Matod pa ni Police Lieutenant Colonel Gerard Ace Pelare, ang tigpamaba ni Police Brigadier General Anthony, Aberin hepe sa kapulisan sa Central Visayas nga gipakusgan pa niini ang ilang anti-illegal drug operations.
Ingon man ang pagpasabot ni Pelare nga ang SACLEO nakatutok sa tanang matang sa kriminalidad sa tibuok rehiyon 7 aron magpabilin nga hapsay ug malinawon ang komunidad.
Apan, giangkon sa gihapon niini nga nagpabiling hagit ang pagtuldok sa problema sa illegal nga drugas sa Central Visayas diin anaa sila’y na-monitor nga supply nga mosulod sa Rehiyon apan bisan paman niini padayon gihapon ang kapulisan sa ilang pakigbisog batok sa ginadiling drugas.
Gani, wala’y natala nga mga bag-ong nagpadagan sa Central Visayas ug gikan gihapon sa Luzon ang supply sa illegal nga drugas nga ipaagi sa land trip nga mao karon ang ilang gihingusgan nga mapakgang.
