CEBU – Mokabat sa 146,000 ka mga beneficiaries ang posibli nga matangtang sa Pantawid Pamilyang Pilipino Program (4Ps) lukop Central Visayas.
Sa eksklusibong pakighinabi sa Bombo News Team kang Shalaine Marie Lucero, ang DSWD 7 Regional Director, gibutyag niini nga ang maong ihap kay mga inactive, non-compliant, wala na’y mga anak nga nag-edad ug 0-18 years old, ingon man nga nalakip sa ‘poor household’.
Matud pa, gimandoan na ang mga local govenment units sa mga dakbayan ug kalungsoran nga magpahigayon ug assessment sa ilahang mga konstituwente nga 4Ps beneficiaries.
Samtang, gitataw ni Lucero nga kung malimpyohan na ang listahan sa 4Ps, hayan aduna na’y mga bag-ong beneficiaries niini apan sa gihapon ipaagi pa kini ug makuti nga pagsusi human nga maka-filled up sa household assessment form.
Sigon pa, dili usab basta nga ibutang na lang dayun ang si bisan kinsa nga nag-apply sa 4Ps, inay kadto lang gayud nga makapasar sa gitawag nga ‘poor households’.
Gihimug-atan sa opisyal nga walay ‘padreno system’ sa naasoy nga programa ug bugtong ang mga angayan lang gayud niini ang malakip niini.
