MANDAUE CITY-Napalgang wala na’y kinabuhi ang 15-anyos nga batang babaye human kini milayat sa ika-19 nga andana sa usa ka condominium sa Barangay Banilad sa dakbayan sa Mandaue.
Sa pakighinabi sa Bombo Radyo Cebu News Team kang Police Lieutenant Colonel Mercy Villaro, ang tigpamaba sa Mandaue City Police Office nga nakita sa CCTV footage nga nag-inusara nga misaka sa andana ang maong biktima hangtud nga miambak kini.
Dugang pa niini nga mipahigayon usab sila og imbistigasyon sa tunghaan sa maong menor de edad arun susihon kon gani adunay problema kini sa iyang pagtungha ug miingon kini nga naghisgot ang bata nga adunay problema sa ilang pamilya.
Apan, sukwahi kini sa giingon sa mga ginikanan diin matud pa nga wala’y namatikdan ang kabanay niini hinungdan nga dili kini makatuo sa maong panghitabo.
