CEBU CITY-Patay ang usa ka 15-anyos nga batang lalaki sa pagpamusil sa wala pa mailhing mamumuno kinsa gikatahong nagpabuto sa iyang armas ngadto sa grupo sa mga menor de edad, diin tulo niini ang nakaikyas, sa Purok 4, Barangay San Jose, dakbayan sa Sugbo Sabado, Marso 16, 2024.
Matud pa ni Pmaj. Janelito Jocson Marquez, Station Commander sa Talamban Police Station 8, alas 7:00 sa buntag sa samang adlaw ang mga personahe sa Police Station ubos sa iyahang superbisyon niresponde sa insidente sa pagpamusil nga nahimutang duol sa Tabor Hills sa Purok 3, Barangay San Jose, dakbayan sa Sugbo.
Sa imbestigasyon nasayran, ala 1 sa kaadlawon, ang biktima nga si Res, 15 anyos, ulitawo, lalaki, ug residente sa Brgy, Bacayan, dakbayan sa Sugbo uban sa iyang 3 ka mga higala, pulos menor de edad nga naglaag-laag sa maong lugar samtang ang ilang mga nawong gitabonan sa ilang kamiseta.
Nasayran nga ilado kining mga kawatan sa maong dapit.
Samtang anaa sila sa akto nga manguha og butang sa mga nakaparada nga mga motorsiklo ug sakyanan kalit nga niabut ang wala mailhing suspek nga adunay tuyo nga patyon sila gipusil ang biktima sa makadaghang higayon nga miresulta sa hinanaling kamatayon, samtang ang tulo niay ka mga higala nakaikyas.
Matod sa higala sa biktima, nga samtang nagdagan sila nakadungog silag singgit og “Aray” gikan sa biktima ug pag-abot nila sa Purok 1 sa maong Barangay ilang nabantayan nga nawala ang biktima.
Dugang pa, nga mga alas 5 sa kaadlawon sa samang petsa, nibalik sila sa ilang gigikanan ug nasuta nga patay na ang biktima.
Dugang pa, nga gikontak sa kapulisan ang team sa SOCO pinangulohan ni PCAPT FRIAS aron sa pagproseso sa crime scene ug pag-recover sa 5 ka piraso sa fired cartridge shell sa .45 pistol.
Ang patay nga lawas sa biktima gidala sa Saint Francis Funeral Homes alang sa post-mortem examination.
Gitino ni Marquez, nga ilahang palagman ang imbistigasyon arun sa pagsuta sa rason sa krimen ug pag-ila sa mga mamumuno.
