Gidakop sa mga operatiba sa National Bureau of Investigation (NBI) Central Visayas Regional Office ang napulo’g lima (15) ka mga indibidwal human sila masakpi nga nagpahigayon og illegal nga panabung o “tigbakay” sa Sitio Bonbon, Barangay Ocaña, Dakbayan sa Carcar niadtong Marso 26, 2026.
Ang maong operasyon gilusad human makadawat ang buhatan og report gikan sa usa ka mabalak-on nga lungsoranon mahitungod sa nagpadayon nga illegal nga sugal sa maong dapit.
Ang mga suspetsado, kinsa giila nga mga sugarol, handler, ug game operator, daling gikuha sa mga otoridad human sa malampusong reyd sa wala’y pagtugot nga sabong.
Giila ang mga dinakpan nga sila si Venz Monseur Orador Mahilum (Monton) nga taga-Ocaña, Carcar City; Rhoderick Tito Secuya gikan sa DAS, Toledo City; Jerick Alegarbes Peterson sa Ocaña, Carcar City; Roxan Lapasaran Aleonar sa Lawis Tawg, Valladolid, Carcar City; Danny Boy Labella Carillo sa Ocaña, Carcar City; Felix Apao Canencia sa Lagang, Ocaña, Carcar City; Reynold Tapao Enjambre sa Lagang, Ocaña, Carcar City; Jherom Tapao Enjambre sa Ocaña, Carcar City; Jimboy Canencia sa Lagang, Ocaña, Carcar City; Reinaldo Villarta Bagol sa Ocaña, Carcar City; Joie Sator Ramos sa Alidugan Proper, Carcar City; Leonilo Signar Simbajon sa Mananga II, Tabunok, Talisay City; Bertoldo Apao Canencia sa Ocaña, Carcar City; Casimiro Villafranca Embodo sa Ocaña, Carcar City; ug Jomar Navesis Cabarrobias nga taga-Media Once, Toledo City.
Gipaubos na ang mga nahisgutang arestado sa Inquest Proceedings gahapong adlawa, Marso 27, 2026, didto sa City Prosecutors Office sa Dakbayan sa Carcar. Ang mga suspetsado mag-atubang og kasong kalapasan sa Presidential Decree (PD) 1602 o ang balaod batok sa illegal nga panabung.
Sa nahimong pakighinabi sa Bombo Radyo Cebu newsteam kang Gregorio Algoso, ang Agent in Charge sa NBI-CEVRO, iyang gikabutyag nga nakadawat ang ilang buhatan og letter sa usa ka concern citizen, hinungdan nga nibuhat kini og beripikasyon.
Apan tataw ni Algoso, aduna na silay namatyagan nga mga tigbakay sa lain-laing mga barangay, ug matod pa, gituohang “scheduling” kini sa syudad sa Carcar.
Sa pagkakaron, nagpabilin ang hugot nga kampanya sa NBI batok sa tanang matang sa illegal nga sugal sa rehiyon aron maseguro ang kahapsay ug kalinaw sa komunidad.
