Padayon pa ang search and rescue operations human nalunod ang usa ka barko nga adunay sakay nga 332 ka mga pasahero duol sa baybayon sa Basilan.
Base sa inisyal nga mga taho, 15 ka persona na ang namatay, samtang kapin sa 300 ang naluwas.
Ang M/V Trisha Kirstin 3 sa Aleson Shipping Lines nalunod mga alas 1:00 sa kaadlawon duol sa Isla sa Baluk-Baluk, sakop sa Hadji Muhtamad, Basilan, samtang padulong sa Jolo, Sulu gikan sa Zamboanga City.
Sumala sa mga awtoridad, ang roll-on/roll-off (Ro-Ro) vessel natikyaob ug nalunod human giigo sa kusog nga mga balud ang ubos nga bahin sa barko.
Gipahibalo ni Basilan Governor Mujiv Hataman nga 223 ka mga pasahero, lakip ang upat ka namatay, ang gidala sa pantalan sa Isabela City.
Dayon nga mipahigayon og search and rescue ang Philippine Coast Guard (PCG), Philippine Navy, PNP, ug mga lokal nga mangingisda.
Nakigtambayayong usab ang mga lokal nga mangingisda ug probinsyal nga awtoridad sa Coast Guard sa rescue operations.
Sa eksklusibong interbyu sa Star FM Zamboanga, gipahayag ni Commander Roel Dua, operational officer sa Coast Guard District Southwest, nga 332 ka mga tawo ang sakay sa barko, lakip ang 27 ka tripulante.
Sumala kaniya, 316 ka mga indibidwal ang naluwas, samtang 15 ka persona ang namatay, lakip ang usa ka unom ka bulan nga bata.
