CEBU CITY- Giluwas sa National Bureau of Investigation sa Central Visayas (NBI-7) ang usa ka 16-anyos nga lalaki sa dakbayan sa Sugbo nga giingong nagdumala sa online group nga nagdasig sa mga miyembro niini, lakip ang mga menor de edad, sa paghimo og mga buhat sa kapintasan, lakip na ang pagpamusil sulod sa mga eskwelahan.
Kalabot niini, gipahimangnoan sa NBI-7 ang publiko sa mga peligro sa online grooming ug sexual nga pagpahimulos sa mga bata, ilabi na sa mga online gaming platform sama sa Roblox.
Matud ni Atty. Maria Contessa Lastimoso, spokesperson sa NBI-7, nagsugod sa pagdula og Roblox ang bata sa edad nga siyam ka tuig ug sa ulahi nakigkomunikar sa ubang magdudula pinaagi sa Discord ug Facebook Messenger.
Gipasabot ni Lastimoso nga ang online grooming usa ka hinay-hinay nga proseso diin ang usa ka indibidwal maningkamot nga maangkon ang pagsalig sa bata pinaagi sa pagpakita og pagtagad ug pagdayeg, sa dili pa kini maniobrahon aron mapahimuslan.
Sa maong kaso, giingong gidayeg ang bata tungod sa iyang abilidad sa online games ug giimbitar nga moapil sa usa ka eksklusibong grupo.
Dugang pa, gikatahong naladlad kini sa mga materyales sa sexual nga pag-abuso sa mga bata nga gihimo gamit ang artificial intelligence (AI), ug nalambigit usab sa pagpangayo og hubo nga mga hulagway gikan sa laing menor de edad.
Tungod niini, giawhag sa NBI-7 ang mga ginikanan ug guardian nga bantayan ang online nga mga kalihokan sa ilang mga anak ug ang ilang pakigkomunikar sa mga tawo nga nailhan lamang pinaagi sa internet.
Gipasiugda usab ang kamahinungdanon sa bukas nga komunikasyon tali sa ginikanan ug anak, ingon man ang diha-diha nga pagreport sa mga kadudahang online interaction aron mapanalipdan ang mga bata batok sa online grooming ug uban pang matang sa pagpahimulos.
