CEBU CITY – Na-ukay ang mga tawu sa Sitio Proper, Barangay Poblacion, lungsod sa Medellin Cebu kaganihang buntag human nga makita ang usa ka 17 anyus nga babaye sa ibabaw sa halos 80 metros nga tore sa usa ka inila nga telecommunication company.
Sa pakighinabi sa Bombo Radyo Cebu kang Police Major Audie Pelayo, ang hepe sa Medellin Police Station, gibutyag niini nga pasado alas-6 kaganihang buntag sa dihang nakita ang nahisgutang menor de edad nga tawagun lang sa ngalan nga ‘Eva’, sa ibabaw sa maong tore hinungdan nga daling miresponde ang Medellin PNP, AFP, ug Medellin Rescue Unit.
Matud ni Police Major Pelayo nga milanat ug kapin upat ka oras ang ilahang gihimu nga negosasyon arun lang nga mukanaug ang maong biktima.
Base sa imbestigasyon sa kapulisan, hilabihan kagu-ul sa menor de edad sa dihang gikasab-an kini sa iyahang maguwang nga babaye gumikan kay giingung gusto niini nga makig-live in sa iyahang hinigugma nga nagpuyo sa Barangay Talamban, dakbayan sa Sugbo.
Human sa makuyaw nga sitwasyon, malampuson nga naluwas sa mga rescuer ang biktima ug dali nga gidala sa tambalanan human kini nga naluya gumikan sa kagutom ug tumang kainit sa panahon.
Nasayran nga nag-brownout usab ang tibu-uk lungsod isip ‘advice’ sa Cebeco II arun malikayan nga makuryintihan ang biktima ingun man ang mga rescuer. (SBR/GN)
