CEBU CITY — Gipahibalo ni Cebu City Mayor Edgardo Labella nga ipang-apudapud sa mga sakop sa kapulisan ang bag-ong quarantine pass ngadto sa mga baranggay sugod karong adlawa.
Adunay control number ang matag quarantine pass ug QR code diin nakabutang ang mga mahinungdanong kasayuran sa usa ka pamilya.
Matud ni Labella nga usa lang ka quarantine pass ang magamit sa matag pamilya ug gamiton lang gayud kini kung adunay palitonon sa gawas.
Exempted sa mga makabaton og quarantine pass ang mga authorized personnel outside of residence (APOR).
Tugutang makagawas ang usa ka quarantine pass holder depende sa schedule niini ug ang katapusang numero sa control number.
Magamit ang quarantine pass nga adunay odd o bungkig nga numero sa katapusang digit sa adlaw nga Lunes, Miyerkules, ug Biyernes.
Samtang magamit ang quarantine pass nga adunay even o pares nga numero sa tumoy sa adlaw nga Martes, Huwebes, ug Sabado.
Walay gitugutang makagawas ang matag usa sa adlaw nga Dominggo gawas lang sa mga essential workers ug APOR.
House-to-house ang mamahimong proseso sa pang-apudapud sa 178,000 ka mga bag-ong quarantine passes ngadto sa mga kabalayan.
