CEBU CITY– Gikompirmar ni Leah Quintana ang tigpamaba sa Department of Social Welfare and Development (DSWD-7) nga 18 sa ilang mga personnel ang nagpositibo sa COVID-19.
Apan matud sa tigpamaba sa dihang nahinabi sa Bombo Radyo Cebu atol sa tulumanong Zona Libre nga ang 11 niini ang nakarecover na ug ang 7 ang naa karon sa isolation center.
Gitataw hinoon ni Quintana nga hugot nila nga gi-enforce ang health protocols ug duna usab sila gipatuman nga mga flexible working arrangments.
Dason pa sa tigpamaba nga gumikan usab sa pagserbisyo sa ilang buhatan sa publiko ug walay puas nga pag-abi-abi niini sa mga kliyente ilabina sa pagpanghatag sa financial assistance maoy hinungdan sa pagkabaton niini sa maong sakit bisan paman sa pag-atiman sa ilang lawas.
Gibutyag usab sa tigpamaba nga ang naasoy nga mga nagpositibo ang nagtrabaho sa nagkalain-laing opisina sa rehiyon ug gisirad-an usa nila ang ilang buhatan sugod niadtong Huwebes, Hunyo 9 ug hangtud adlaw nga Biyernes, Hunyo 10 alang sa disinfection.
