INDIA-Labing menos 18 ka mga tawo ang namatay sa nahitabong stampede sa usa ka estasyon sa tren sa India, New Delhi niadtong Pebrero 15, samtang ang mga tawo naglumba aron makasakay sa mga train paingon sa pinakadako nga festival sa kalibutan, ang Kumbh Mela.
Gihimo kini matag 12 ka tuig sa Prayagraj, nga nagdani sa milyon-milyon nga mga deboto sa Hindu.
Sumala sa mga taho gikan sa mga awtoridad, ang stampede nahitabo sa dihang ang mga deboto misuway sa pagsakay sa mga tren aron sa pagsalmot sa festival, nga matapos karong Pebrero 26.
Gihulagway sa lokal nga mga awtoridad ang talan-awon nga labing delikado nga nahitabo sa estasyon sa bag-ohay nga mga tuig.
Matod ni Dr. Ritu Saxena, Deputy Medical Superintendent sa Lok Nayak Hospital sa New Delhi nga kadaghanan sa natala nga nakumpirmar nga namatay kay tungod sa ‘hypoxia’ samtang adunay 11 ka inidibidwal ang natala nga naangol, kadaghanan kanila grabe ang kahimtang ug adunay mga orthopedic injuries.
Nagpahayag sa iyang pahasubo si Prime Minister Narendra Modi sa mga pamilya sa namatay bahin sa trahedya.
Samtang, gimanduan na usab nga magdeploy og mga personahe sa pagdumala sa katalagman ug pagsiguro nga ang mga ospital andam sa pagtubag sa mga panginahanglanon sa publiko.
