CEBU CITY — Gipaubos na sa self-quarantine ang 19 ka mga South Koreans nga anaa sa Sugbo sulod sa ilang tagsa-tagsa ka mga hotel rooms aron kalikayan ang posibleng pagkatap sa coronavirus disease o COVID-19.
Matud ni Department of Health (DOH)-7 Director Dr. Jaime Bernadas nga gipaubos sa close monitoring ang mga bisita gikan sa Daegu City, South Korea.
Usa ang maong syudad sa mga labing apektadong lugar sa maong nasud subay na sa nagkasaka nga kaso sa coronavirus.
Niabot ang 26 ka mga Korean tourist sa Mactan-Cebu International Airport niadtong Pebrero 25, usa ka adlaw sa wala pa gideklarar ang travel ban paingon sa maong nasud.
Gi-angkon ni Bernadas nga nagkalisud sila sa pag-trace sa nahimutangan sa pito ka mga turista gikan sa Daegu City sa Sugbo.
Tungod niini, nagpatabang ang DOH-7 sa Cebu Provincial Police Office (CPPO) ug sa Korean Consulate alang sa pagtultol sa gipangita pang mga bisita.
Kun ugaling wala gideklarar sa nahisgutang mga turista ang ilang kahimtang sa health declaration forms, ibalik sila ngadto sa South Korea.
