CEBU – Gihangyo ni Lapu-Lapu City Mayor Junard ‘Ahong’ Chan ang publiko nga patas-an ang pasensya gumikan sa gilauman nga baga nga duot sa trapiko atol na sa ipahigayon nga Megaworld Ironman 70.3 race karung Agosto 7, 2022 adlaw nga Dominggo.
Matud pa sa mayor nga adunay mga re-routing ang ipahigayon gumikan sa pagsirado sa pipila ka mga kadalanan gikan sa Barangay Mactan, Punta Engaño, Maribago, Agus, Marigondon, ug Subabasbas, alang sa naasoy nga event.
Gawas pa niini, gidugang ni Chan nga ang mga sakop sa Lapu-Lapu City Police Office (LLCPO) kauban ang mga Barangay Police Security Officers (BPSOs) ug mga force multipliers ang i-deploy sa mga hotel ug mga rota nga agi-an sa mga triathletes, mga guest ug mga mutan-aw, alang sa ilahang seguridad.
Gikan sa dakbayan sa Lapu-Lapu, mu-agi ang mga triathlete sa lungsod sa Cordova, mutabok sa Cebu-Cordova Link Expressway (CCLEX) ug paingon sa dakbayan sa Sugbo.
Nasayran nga mukabat sa 1,900 ka mga partisipante gikan sa 46 ka mga nagkalain-laing nasud ang anaa na sa Sugbo arun nga musalmot sa naasoy nga triathlon event.
