BRITISH COUMBIA, Canada – Natala sa Canada ang una nilang kaso sa human H5 bird flu sa probinsya sa British Columbia diin 22 ka poultry farms ang determinadong nataptan sa virus sumala sa mga opisyal sa panglawas.
Nasuta nga ang nataptan sa maong sakit usa ka teenager nga gidudahang nataptan sa virus gikan sa langgam o ubang mananap.
Ang H5 bird flu o avian influenza usa ka klase sa virus nga kasagarang makaapekto sa mga mananap ilabi na sa mga langgam nga mahimong mokatap sa mga tawo kung ang mga mananap nga adunay virus direktang mahikap, kan-on o masimhot.
Sa pagkakaron, ang biktima kasamtangang nagpaalim sa tambalanan sa mga bata.
Matod sa Canadian health minister nga si Mark Holland, padayon nilang gipangita ang tinubdan sa impeksyon ug giunsa kini pagpasa sa biktima.
Samtang ang ubang mga eksperto nabalaka tungod kay adunay ebidensya nga nagpamatuod nga ang virus mahimong usa ka ‘pandemic’ tungod sa posible nga pagpaspas sa impeksyon sa ubang mga tawo.
Pipila sa mga sintomas niini nga virus mao ang hilanat, ubo, sip-on, kalisud sa pagginhawa, pagkalipong ug sakit sa lawas.
Samtang sa Pilipinas, gipailawom sa surveillance ug hugot nga monitoring ang lalawigan sa Cagayan human ang H5N1 strain sa bird flu virus mitugpa sa gamefowl sa lungsod sa Solana niadtong Enero, 2023.
Sunod niini, gianunsyo sa Department of Agriculture (DA) ang lalawigan sa Cagayan nga libre na sa bird flu human kini negatibo sa virus.
