Gipamatud-an ni Amabel Ostria nga taga sa Daan Lungsod, Alcoy, Cebu, usa sa mga Sugboanon nga nakadaog sa 1st Prize nga nagkantidad og P25,000 sa Grand Draw sa Swerte sa Palengke Promo 2026, nga kung adunay pailub, adunay ani.
Kini gumikan wala siya mihunong sa paghagbong og mga entry ug wala nawad-an og paglaom nga maabot ang tukmang panahon nga makadaog kini og dako nga premyo.
Atol sa pakighinabi sa Bombo Newsteam kang Ostria, gipaambit niini nga dako ang iyang kalipay ug pasalamat sa Bombo Radyo ug Star FM.
Gipadayag usab niini nga iyang plano sa iyang nadag-an diin iyang itagana kini sa pagbayad sa ilang kuryente, tubig, ug sa mga panginahanglanon sa eskwelahan sa iyang mga anak.
Gisaysay usab niini ang iyang kaagi sa pag-apil sa maong promo. Sumala niya, tungod sa ilang dapit nga kabukiran, maglakaw siya paingon sa mga tindahan ug manguha sa mga ilabay nga tansan o crown caps ug uban pang mga mamahimong magamit isip proof of purchase.
Bisan pa sa mga pamasin ug ulaw nga iyang gibati, gipakita ni Ostria nga ang tiunay nga paglaum ug pagpaningkamot maghatag gihapon og maayong ganti sa katapusan.
