CEBU CITY – Napakyas ang Philippine National Police pagpangita sa bigtime druglord ug negosyante nga si Peter Lim sa dihang luwatan og warrant of arrest sa 2 niya ka balay sa dakbayan sa Sugbo.
Gipanguluhan sa Mabolo Police Station ug inubanan sa Cebu City Police Office (CCPO) ang pagluwat sa warrant of arrest.
Unang giadto sa duha ka kampo ang ancestral house ni Lim sa Brgy. Kasambagan, dakbayan sa Sugbo ug sunod nilang giadto ang ilahang village sa Brgy. Banilad sa nahisgutang syudad.
Nagkanayon ang hepe sa Mabolo Police Station nga si Chief Insp. Dindo Juanito Alaras nga naistoryahan nila ang caretaker sa ancestral house ni Lim sa Brgy. Kasambagan ug nasayran nga 10 na ka tuig nga wala mibiista ang negosyante sa balay maong wala sila modayon ug sulod. Samtang napakyas usab ang hepe sa City Intelligence Branch sa CCPO nga si PCI Henrics Bancoleta sa dihang giadto nila ang laing balay ni Lim sa ilang village sa Brgy. Banilad ug wala nila makit-i ang negosyante.
Apan gihingusgan ni Alaras nga dili sila mohunong pagpangita ni Lim ug tan-awon pa nila ang mga establisimento ni Lim sa syudad samtang aduna pay 9 ka adlaw nga nahibilin aron luwatan si Lim og warrant of arrest.
Gawas sa Mabolo Police Station ug City Intelligence Branch, nakighiusa usab ang mobile forces ug Investigative and Detection Management Branch sa CCPO alang sa pagpangita ni Lim.
Nasayran gikan sa intelligence monitoring sa pulisya nga naa sa Pilipinas si Lim ug nagkanayon ang immigration nga nakauli ang bigtime druglord gikan sa laing nasud niadtong Marso.
