Niigo ang mga kusog nga duha ka aftershocks sa Afghanistan, sulod lamang sa nilabay nga 12 ka oras.
Ang maong aftershocks nagsunod human sa kusog nga 6.0 magnitude nga linog nga nitay-og sa nasod sa niaging upat ka adlaw, diin nakapatay kini sa 2,205 ka tawo ug nakaangol sa 3,640, sumala sa gobyerno sa Taliban niadtong Huwebes. Nunot niiini, mas gilauman pa nga motaas pa ang ihap sa nangamatay ug naangol human sa kusog nga aftershocks.
Sumala sa mga taho sa lokal nga media, ang mga aftershocks nagpadayon sa pag-igo sa probinsya sa Nangarhar ug ang mga detalye sa kadaot nga gipahinabo sa kusog nga aftershocks padayon pa nga gitino.
Sa sayo pa, usa ka aftershock nga may sukod nga 5.4 sa Richter scale ang niigo sa habagatan-sidlakan gahapog adlawa, Biyernes sa giladmon nga 10 km o 6.2 ka milya, matod sa German Research Center for Geosciences (GFZ) human sa laing pag-igo niadtong Huwebes sa gabii.
Busa, gipasidan-an sa United Nations ug uban pang mga ahensya ang usa ka kritikal nga panginahanglan alang sa mga pondo, pagkaon, mga suplay sa medisina ug puy-anan alang sa mga naluwas sa linog.
Agig tubag, ang World Health Organization (WHO) naghangyo alang sa $4 milyon nga pondo alang sa mga biktima sa linog sa Afghanistan.
