CEBU CITY – Laing mga baranggay officials na usab ang nasikop atol sa gipahigayong operasyon sa Provincial Intelligence Branch ug Provincial Drugs Enforcement Unit sa Cebu Provicial Police Office.
Nasikop sa mga kapulisan ang duha ka mga baranggay opisyal sa lungsod sa Asturias pinaagi sa search warrant nga gi-issue ni Honorable Judge Jacinto Fajardo sa Branch 66 sa Talisay City RTC gumikan sa paghupot sa mga armas nga walay lisensya.
Ang mga nasikop mao sila si Konsehal Camilo Dacal-dacal, 45 anyos, barangay konsehal sa Brgy Sta. Rita ug Kapitan Mario Tundag, barangay Kapitan sa Barangay Manguiao sa lungsod sa maong lungsod.
Nakuha ni Dacal-dacal ang ingram nga armas, mga nagkadaiyang bala sa armas ugb usa ka medium nga pakite sa gituohang shabu.
Nakuha naman ni Kapitan Tundag ang usa ka KG9 nga armas sa sulod pa mismo sa ambulansya nga naka park gawas sa iyang balay.
Matud ni Police Supt Joie Yape, ang hepe sa PIB nga nideny pa si Kapitan Tundag nga duna siyay armas apan atol sa inspeksyon sa kapulisan nakita ang KG 9 ug didto na niini giuangkon nga iyaha gayud ang maong armas.
Mag atubang ug kasong kalapasan sa RA 10591 si kapitan Tundag samtang kalapasan sa RA 10591 ug RA 9165 si konsehal Dacal-dacal.
Samtang gi-imbestigaran usab sa PIB ang kalambigitan sa duha ka mga nasikop nga baranggay opisyal ngadto na sa inilang drug Lord nga si Franz Sabalones.
Matud ni Police Supt. Joie Yape, ang hepe sa PIB nga nakadawat sila og impormasyon gikan sa mga una na nilang nasikop kalabot sa kalambigitan nilang Sta Rita Konsehal Camilo Dacaldacal ug Brgy Maguiao Kapitan Mario Tundag sa lungsod sa Asturias, diin matud pa nga nalambigit usab sa pagpayuhot sa ginadiling drogas.
Nagkanayon si Yape nga posibleng miyembro sa Sabalones Drug Group ang duruha.
Nakadawat usab ug impormasyon ang kapulisan nga matud pa kanunay nga mani-on ug armas si kapitan Tundag kung kini ang mahubog.
Sa pagkakaron naa na sa kustodiya sa PIB ang mga dinakpan samtang gi turn over naman sa PNP crime lab ang mga ebedensyang nakuha sa mga dinakpan.
