Gipresentar sa otoridad sa mga sakop sa media ang duha ka Chinese National nga nadakpan sa hiniusang operasyon sa mga sakop sa Anti Kidnapping Group Visayas Field Unit sa PNP gumikan sa pagkidnap niini sa laing tulo ka mga Chinese National.
Giila ang mga suspek nga silang A Gui og Xiao Fan nga nangidnap sa kababayan niini sa Techwood Subdivision Barangay Soong, Lapu-Lapu City.
Nasayran nga parehong nagtrabaho sa Philippine Offshore Gaming Operator (POGO) sa Lapu-Lapu City ang mga dinakpan.
Nakaabot sa mga otoridad ang maong insidente human nadawat ang report gikan sa Chinese Consulate may labot sa tulo ka Chinese nga iligal nga gitago sa usa ka subdivision sa Barangay Mactan dakbayan sa Lapu-Lapu.
Nasayran gikan sa otoridad nga nahitabo ang negosasyon alang sa kidnap for ranson didto sa nasod China human nangayo og dakong kantidad ang mga suspetsado bugti sa kagawasan sa mga biktima.
Gisuta na sa kapulisan sa PRO 7 og Anti-Kidnapping Group Visayas ang kalambigitan sa mga suspek ngadto sa uban pang mga Chinese nga nagtrabaho sa POGO nga nalambigit sa susamang krimen.
Gibutyag ni PRO-7 Director Police Brigadier General Albert Ignatius Ferro nga usa ka “isolated case” ang maong insidente og padayon nila kini nga giimbestigaran kung aduna ba’y kalambigitan sa krimen sa mga trabahanteng Chinese sa POGO sa Metro Manila nga padayon nga giimbestigaran sa Senate Blue Ribbon Committee.
Samtang, anaa na sa luwas nga kahimtang ang tulo ka mga biktima nga batan-ong Chinese human ma rescue ganinang buntag gikan sa mga kamot sa kababayan niining Chinese National. (With reports by Bombo Eric Amaro/gs)
