Nasikop sa Mandaue City Police Office (MCPO) ang duha ka mga indibidwal human gireklamo sa ilang sikreto ug ginadiling paghinigugmaay sa usag-usa sulod sa usa ka motel sa maong syudad niadtong Martes Santo, Marso 31, 2026.
Sumala pa sa pamahayag ni Police Col. Mercy Villaro-Kantuna, ang tigpamaba sa MCPO nga gi-aresto ang duha pasado alas 1 sa kadlawn sa motel nga nahimutang sa Barangay Subangdaku.
Giila ang mga dinakpan nga sila alyas “Ivy”, babaye, minyo, 42-anyos, ug residente sa Barangay Bakilid samtang ang kauban niini gidudahang iyang kabit kay si alyas “Jo”, lalaki, minyo sab, 32-anyos, ug residente sa Barangay Cabancalan. Nasuta nga mga kanhi job order employees ang duha sa Mandaue City Hall og gitaktak tungod sa ilang binuhatan.
Gilusad sa MCPO ang pagsikop sa duha human ang bana ni Ivy nga si alyas “Dan” kay mireklamo sa ilaha sa pagduda nga adunay kabit iyang asawa nga nakapahupas sa ilang gugma ug kaminyoon.
Daling miaksyon ang MCPO Police Station 2 sa maong reklamo hinungdan nga nasikop diha-diha dayon (flagrante delicto) ang duha ka dinakpan sulod sa maong motel.
Magatubang ang duha sa reklamong Adultery ubos sa Article 333 sa Revised Penal Code diin kasamtangang anaa sila sa pasilidad sa MCPO samtang gihikay ang ilang kaso.
