CEBU – Duha ka mga magtutudlo sa Langob Elementary School sa lungsod sa Asturias sa amihanang bahin sa Sugbo ang gikatahong nawad-an sa ilang mga bag nga adunay daghang kuwarta niadtong Miyerkules sa buntag, Hunyo 29, 2022.
Giila sa kapulisan sa Asturias ang unang biktima nga si Master Teacher Melche Conception Trazo, 51 anyos, babaye, minyo, ug residente sa Barangay Poblacion, Asturias, Cebu.
Ang ikaduhang biktima giila nga si Bryll Krystyl Tulod Geralde, 33 anyos, babaye, minyo, ug magtutudlo sa Grade 3.
Nawad-an og nilibo nga kwarta (cash), ATM cards, importanteng ID ug dolyares ang maong mga magtutudlo.
Base sa nakuhang impormasyon sa kapulisan, nabantayan ni Trazo nga adunay usa ka lalaki nga nag-jacket sa gawas sa iyang classroom ug sa dihang iya kining gisusi dali kining miikyas pinaagi sa pag-ambak ngadto sa dili agianan nga lugar ug didto na usab niya nahibaw-an nga nawala na ang yahang duha ka pitaka.
Ni-angkon ang ikaduhang biktima nga wa siyay nakitang tawo apan nakabantay nga naguba na ang usa sa mga bintana sa iyang classroom.
Giimbestigahan na karon sa kapulisan sa Asturias ang maong insidente ug nanghipos og mga datos aron mahibaw-an kun si kinsa ang suspetsado.
