Cebu City- Patay ang duha ka managsuon human wala makagawas gikan sa nasunug nilang balay sa Sitio Kawit Brgy Ermita ning dakbayan sa Sugbo ganihang sayo sa buntag.
Ang mga biktima mao sila si Jovelyn Digman, 9 anyos ug John Mark 2 anyos. Dili na mahitsura ang mga managsuon human mapaig sa nahitabong sunug.
Matud ni Cebu City Fire Marshal , Fire Chief Inspector Noel Ababon , posible nga gi protektahan ni Jovelyn ng igsuon niini nga si John Mark basi na usab sa ilang posisyon apan wala sila makagawas sanglit natagak ang kama gikan sa ikaduhang andana sa ilang gipuy-an nga maoy nakaali sa ilang agi-anan.
Gawas sa mga namatay, nalandig usab sa tamabalanan ang 10 ka tawo lakip na ang ginikanan sa duha ka mga biktima human makaangkon ug paso sa nagkadaiyang bahin sa ilang lawas. Matud pa nga gisulayan pa sa maglive in partner nga Joel Digman ug Edalyn Alalud nga luwason ang ilang mga anak apan kalit lang nga midako ug mikatap ang kayo.
Nakaangkon sab ug paso sa kalawasan ang kinamaguwangang anak sa mag-live in partner nga si Jenelyn Digman, 14 anyos ug naa karon sa Cebu City Medical Center.
Nasayran nga sa balay sa banayng Digman nagsugud ang kayo sa dihang mibutyo ang kerosene stove nga gigamit sa mag live-in partner sa pagluto sa ilang itinda sa pungko-pungko.
Mukabat sa 1.5 million pesos ang danyos sa maong insidente diin miugtdaw kini ug kapin 90 ka mga panimalay.
