Mandaue City– Nagpakaaron-ingnon nga bayot ang duha ka pulis aron makuha ang pagsalig sa usa ka gidudahang drug pusher sa buy-bust operation nga miresulta sa pagkasikop sa kapin usa ka kilo nga gituohang shabu diin mobalor sa P6.97 milyones.
Kini nahitabo sa M.L. Quezon Avenue sa Barangay Maguikay, dakbayan sa Mandaue pasado alas dose sa tungang gabii niadtong Biyernes, Pebrero 9.
Matod pa Police Colonel Mercy Villaro, Public Information Officer sa Mandaue City Police Office (MCPO) ug hepe sa Center for Police Strategy Management Unit (CPSMU), ang ilang kapolisan, usahay, mohimo og lain-laing mga stratehiya aron makuha ang atensyon sa ilang suspetsado, mao nga nakahunahuna ang mga operatiba nga i-project ang iyang cover story nga sila bayot.
Hinungdan nga sa aktuwal nga operasyon nga nagsul-ob og mga daster alang sa ilang panagkita, wala nagduda ang mga suspek sa ilang panagkita, ug nakapakombinsir kini sa ilang estorya.
Dugang pa ni Villaro nga duha ka mga polis ang nagtakoban ang nagsul-ob og sanina nga duster, ug niaksyon nga bayot dihang nakigtransaksyon sila sa suspek nga giilang si Alyas Roger, 56, usa ka public utility jeepney driver sa Barangay Buhisan, dakbayan sa Sugbo, atol sa buy-bust operation.
Hinuon, wala usab damha sa kapulisan nga ilahang makuha gikan ni alyas Roger ang usa ka kilo sa gituohang shabu atol sa operasyon hinungdan nga nabutang kini sa drug personality list ang maong suspek isip high value individual.
Gibanabana nga maka-disponer ang maong suspek og 100 gramos ngadto sa 200 gramos nga shabu sulod sa usa ka semana diin ang iyang distribution area mao ang Mandaue ug Cebu City.
