CEBU – Nasikop sa buy-bust operation ang duha ka lalaki sa Barangay Dumlog, dakbayan sa Talisay gabie Biyernes, Septiyembre 9, 2022.
Giila ni Police Lieutenant Colonel Randy Caballes, hepe sa Talisay City Police Station ang mga dinakpan nga sila si John Ian Amigable, 22, ug Jonathan Alcober Alas-as, 25.
Dugang pa sa hepe nga nakuhaan sila og gituohang shabu nga mobalor og P2 milyones gikan sa mga suspek, nasakmit usab nila ang usa ka kalibre .45 nga pistola gikan sa posesyon ni Alas-as atol sa operasyon, nga nahitabo mga alas 9 sa gabii sa Sitio Manga sa Barangay Dumlog.
Matod ni Caballes nga pasakaan og kasong kalapasan sa Dangerous Drugs Act of 2002 ang mga suspek karong Lunes, ug ang dugang reklamo sa illegal possession of unlicensed firearms ang ipasaka usab sa Alas-as.
Base sa ilang imbestigasyon, ilang nasayran nga si Amigable nagtrabaho isip “bodegero” sa usa ka piniriso nga nailhang ‘Taitus,’ kinsa natanggong na karon sa Cebu City Jail sa Barangay Kalunasan, samtang si Alas-as nakigtambayayong kang Amigable kay siya maoy gitahasan sa pagtunol og shabu ngadto sa ilang mga kustomer.
Ang mga suspek, matod ni Caballes, maka-dispose og 300 ngadto sa 500 gramos nga shabu matag semana ngadto sa mga pumapalit sa Metro Cebu.
Ang maong mga lalaki nitug-an sa kapulisan nga wa pa nila igkita ang supplier sa shabu nga maoy ilang gitahasan sa paghatod.
Ilang giangkon nga tawgon lang sila sa telepono aron magpadala og delivery sa bayronon nga P10,000 nga parehas nilang gibahin.
Kasamtangang gitanggong ang duha ka mga suspek sa detention facility sa Talisay City Police Station.
