BOHOL-Duha ka tulisan ang patay sa pinusilay sa Purok 1, Barangay Anislag, lungsod sa Corella, ning lalawigan sa Bohol, niadtong Sabado sa gabii, Hunyo 1, 2024.
Giila ang mga suspek nga sila si Ricky Gamo nga residente sa Brgy. Tagbuane, lungsod sa Alburquerque, ug Jonas Amen taga Ubujan District, dakbayan sa Tagbilaran.
Sa wa pa ang pinusilay ani kontra sa mga unit sa Provincial Intelligence Unit (PIU) sa Bohol Provincial Police Office (BPPO), ang mga suspek ug kauban niini nisuway og tulis sa usa ka babaye sa lungsod sa Sikatuna.
Misinggit og tabang ang babaye hinungdan nga nisibat ang mga suspek sakay sa kolor pula nga motorsiklo.
Atol sa hot pursuit, nasigpatan sa kapolisan ang mga suspek diha sa lungsod sa Corella.
Dihang gisuwayan sa pagpahunong sa mga pulis, misibat ang mga suspek, gibiyaan ang ilang motorsiklo, ug miikyas paingon sa lasang nga dapit samtang gipusil ang mga kapulisan.
Sa misunod nga panghitabo, usa ka opisyal sa PIU ang naigo apan wala maunsa tungod sa iyang bulletproof vest.
Duha ka mga suspetsado ang gipusil ug pagkahuman gideklarar nga dead on arrival sa Gov. Celestino Gallares Memorial Medical Center sa Tagbilaran City.
Ang ikatulong suspek nakaikyas ug pabiling gawasnon og padayong gipangita sa mga awtoridad.
Ang mga namatay nga suspek dunay naunang rekord sa pagpangawat ug pagpangawat ug nalambigit sa sunodsunod nga pagpanulis niadtong Mayo sa Maribojoc, Tagbilaran City, ug Dauis.
