METRO MANILA-Gikatakdang madawat sa Philippine Air Force (PAF) ang una sa 2 ka long-range patrol aircraft nga gigama sa Israel.
Matod ni Israeli Ambassador to the Philippines Ilan Fluss, ang inisyal nga paghatod sa maong mga eroplano gilauman nga moabot sa nasod sa tunga-tunga sa 2025.
Kini human nga nakuha sa Elbit Systems Ltd. sa Israel ang $114 milyones nga kontrata alang sa suplay sa 2 ka units sa long-range nga patrol aircraft nga nasangkapan sa advance ug comprehensive mission suite, usa ka network sa mga component nga gigamit sa pagkompleto sa aerial surveillance nga adunay real-time nga pag-apod-apod sa impormasyon sa yuta.
Ang pagpalit sa PAF og long-range patrol aircraft kay usa lang sa mga nag-unang prayoridad sa unang hugna sa modernisasyon nga programa sa militar.
